Staubwolgge Fasnacht 2019

Mir kömme iine und stöhn doo,
saage Tschüss, mir wänn jetzt goo.
Trotzdäm dien mir d Värs no bringe,
blyybe doo und dien no singe.
Das Byschpiil doo het sich bewährt,
mir hän euch «Brexit» kurz erkläärt.

Im Spiegelhof so ganz dief unde,
het me alti Gnoche gfunde.
E ganze Kopf vom e Kamel,
im Baschi juggd grad s Hoor-waggs Scheel.
Doo hets allem Aaschyyn aa,
in säller Zyt scho Schugger ghaa.

Negro Rhygass, Mohreköpf,
Bruunsli, schwarzi Bluemetöpf.
Schoggibolle, Barbecue,
e Niggerli mache isch Tabuu.
Au d BVB mir häns nit glaubt,
Schwarz-faahre sig dert nit erlaubt.

E Handy mit 5 G Transfer,
kocht di Hirn im Straalemeer.
Ooh du gails Smaaartphooone, straaal.
Duesch in 5G Wälle groote,
duets Tier und Pflänzli Broote.
Exit bruucht jetzt niemer mee,
mit 5G duets di nüm lang gee.
Doch mir hän noochhaltig däängt,
drum hän mir im Trump, au so e Handy gschäängt.

Dää Haltstelltescht isch jetzt verbyy
löönt doch die grieni Linie syy.
Die Linie schütze das isch woor,
vor dr Randstai Absturz-Gfoor.
Au Trottoirschwalbe findes glatt,
die stöön denn in dr ganze Stadt.

Dr Papscht kunnt uff Gänf,
und badet im Sänf.
Do kunnt e Forälle,
und bisst ihn in d Schälle.
Dr Papscht dää sait, ich bhalts für mii
und hoff die isch schoo zwölfi gsii

Ich due danzend Kriischna singe,
das duet mir d Erlüüchtig bringe.
Ich mach Yoga zum verbiege,
Kamasutra zum Vergniege.
Wottsch Indisch Meditiere gsee,
no gang an Match vom FCB.

Dr Schaich Ali Ben Lachafall
gniesst d Toblerone neu Halall.
Die Matterhornspitz mach ich e Wett,
gits glyy in Form als Minnaret.
Mit Läggerli könntsch im vertraue,
in Mexico e Muure baue.

Am morge frieh wenn d Stadt verwacht,
isch d Ackermaa uff d Nase kracht.
Rittbärger, Salto fascht pariert,
s Elektrodrotti het blockiert.
Doo hilft nur Botox, hörsch d Ärzt saage,
oder halt e Burka traage.

Die letschti MUBA isch verby, de muesch si jetzt vergässe,
mir dien jetzt an d Olma goo, zum groossi Brotwürscht ässe.
Für d Chaote-Schääde muess d Regierig jetzte spaare,
z letscht muess denne d BVB, mit flache Fingge faare.

Letschthin grad im Groossrootsaal gsesch aini d Bruscht grad gää,
das isch nur d Frau Ackermaa, wo ain zer Bruscht duet nää.
Dr Wessels wie dr FCB kain wais wie laischtig goot
nur dr Koller sait zur Not, gits z letscht no Gummischroot.

Gosch nit mit em Flugzüüg furt und duesch dr d Krüüzfaahrt spaare,
e Joor lang kasch den s Auti nää und tausig Fürz lo faare
Wäg em Klima wo sich wärmt, d Studänte mache Drugg,
doch wenn z letscht in Zolli luegsch, sin d Pinguin wieder zrugg.

D Schugger z Basel wäg em Tesla, sii es isch zem Lache,
wäg dr neye Technik, mien die zerscht e Flugschuel mache.
D Tüüre göhn wie Flügel uff, denn hörsch die Schugger flueche,
und bis z letscht verzwyyfle sii, bim Tank-füll-Stutze sueche.

Friehner moolsch bim Krippespiel dr König aa mit Kohle,
hüt im Kindsgi kasch denn grad, zwai mit wyss aamoole.
Multikulti isch in Basel richtig praktiziert,
und bis z letscht doo wärdemir als Schwiizer integriert.