Schuumschleeger 2019

1
dr Shaqiri und si Fründ, dr Granit Xhaka,
hänn e Juubelscheste zämmen yystudiert kaa.
Doch blööderwyys luegt s wien e Doppeladler dryy,
derbyy hätts doch e Basler Dyybli sotte syy.
Zu de Schwoobe, ooni z spasse,
wuurd dr Plaitegaier basse.

2
En Autibombe explodiert zmitts inre Stadt
Me gseets am Färnsee und me liist s in jedem Blatt.
In Basel kaa das nie bassiere, jeedi Wett,
well s dangg em Wessels wyt und brait kai Parkpatz het.
Wottsch dr Velo-Wessels braiche,
muesch em nur an d Spaiche saiche!

3
As me bim Ummefliege no mee spaare kaa,
biete d Billig-Airlines bald scho Steeblätz aa.
Und zum Lande nämme drum, das wird e Hit,
d Pasaschier scho glyy dr aige Fallschirm mit.
Mir mien nit billig fliege wie die maischte,
mir könne n uns dr Zug no laischte?

4
S git Uuryywooner dief im Urwald z Borneo,
die het me scho syt Joore nümm zu Gsicht bikoo.
Doch e Sichtig wo no lenger retuur goot,
isch e Basler Bebbi z Bärn im Bundesroot.
Derbyy gääbe mir jo no so gärn,
unsre Wessels ab uff Bärn.

5
Moorekopf und Nääger daarf me jo nümm saage,
s Negro Rhygass Logo sorgt für Unbehaage.
Si hättes bhalte könne, d Löösig lüchtet yy,
nur hätt das Männli en Albino sotte syy.
Statt Mooreköpf, saag ich potzduusig,
in dr Nacht schwäär erkennbaari Guggemuusig.

6
Es schneielt, es beielet, es goot e Wind,
es Kind legt Häntschen aa und baut e Schneemaa gschwind.
E Studänt, e gscheite, duet grad reglamiere,
hee Kind, de muesch dä Schneemaa vyyl mee pigmentiere.

d Alice Schwarzer macht Radau:
dä Schneemaa hätt si gärn als Frau.

do heersch d Nora Illi glaage:
e Schneefrau muess e Burka draage.

dr Minu wott e waarme Maa,
aine wo nit schmelze kaa.

d Veganer hänn Inträsse draa,
well me d Naasen ässe kaa.

De Baselbieter fallt no yy,
dr Schnee miesst aber gratis syy.

7
E Veganer het, dä isch doch nit ganz bache,
sich bim Zaanarzt Borer s Zaanflaisch wägg lo mache.
Und e Fructarier in dr PUK het, voll besässe,
in syyner Noot dr aigen Augenöpfel gässe.
Duet s Vroni sich am Bäumli ryybe,
duet si Ökosex bedryybe.
Bisch Masochischt und nit ganz bache,
kaschs au mitme Kaktus mache.

8
Si dien Orangsche schelle und in Blaschtigg schwaisse.
Au d Aier und d Banaane, di hänn doch e Maise.
Nur dr Fisch kunnt quasi blutt im Groosse Ganze,
denn dr Fisch het d Blaschtigggugge scho im Ranze.
E Qualle het sich, well s re gfallt,
in e Blaschtiggsagg verknallt.

9
Bim Prinz Charles wird glacht wäg syyne groose Oore,
d Zürcher wärde schyynts mit groossem Latz geboore.
Au vom Trump do gits scho duusig blöödi Väärs,
doch dr Helge isch no glatt , tschau das wäärs.