's Spitzig Ryssblei 2019

Wenn das Presidiaaldep. in der Dalpenvorstadt,
und das Baudep. so ebbis glungenes vorhat.
Dann werden die Trottwarrändlein obenabengehauen,
man weiss nicht gnau was man wo wött bauen.
Syy verstehen sich ammen gar nit neumenduuren,
wenn syy im Grossrat söllen hochdeutsch schnuuren.

E Schtudänt im 30. Semeschter,
meint ‘s Negro-Rhygass Logo sig vo geschter.
En anders Schdudänt, e ganz gscheits Wääse,
will ass me d’ Wältwuche nimm darf gratis lääse.
Glaar ass de dr’ gsundi Verschtand vergissisch,
wenn in dr’ Mensa nur vegatarisch issisch.

D’ Frau Meier drill im Gundeli,
mit em Hundeli e Rundeli.
Doo setzt das Hundeli e Pfundeli,
an das wieschte Hochhuus im Gundeli.
Numme wäg däm Hundeli,
schdinggt das Hochuus jetz au no im Gundeli.

Dye Sitzyge vom Bundesroot,
sin vom Morge gange, bis z’Oobe schboot.
Mänggmool fascht die ganzi Nacht,
hänn die Iiberschdunde gmacht.
Jetz geen dye Sitzyge nur no Dreivyertelschdund,
syt dr’ Schneider Ammann nimme kunnt.

Ych ha d’ Badderye vo mym Tesla glaade,
und bi mit e baar Kollege uff Baade-Baade.
Zerscht hän mir im Casino ‘s ganz Gäld verzoggt,
sin die halb Nacht in e Fuudischubbe g’hoggt.
Wiider dehei hetts schuurig dätscht
joo dr’ Tesla hett myynere scho alles verrätscht.

Guet dyen d’ Spitääler jetz nit fusionyere,
susch hätt im Uni-Spittel könne bassyere,
ass dr’ Profässer Krause zur Schwester Irmgard seit,
legen sie mir bitte das Skalpell bereit.
Do meint d’ Schweschter Irmgard Scholz,
das Skalpell ist heute auf dem Bruderholz.

Ych due an dr’ Costa del Sol am Strand entlang laufe,
doo will mir son e schwarze Verkäufer e Uhr verkaufe.
Won ych ney gseit haa do wird dä muff,
und meint är gäb si Tschob doo soo wy soo uff.
Är laufi nimm lang dur dä heissi Sand,
är bekääm z’ Basel an dr Uhre und Schmuggmäss e Stand.
Statt bim Schryybe oder Rächne glänze,
dien d’ Schyehler d Schuehl für d Umwält schwänze
Au dr’ Kevin isch fir dä Protäscht bereit,
drum hett är zue syynere Mamme gseit.
Ych kumm z’ schboot an Demo nundefaane,
faar my schnäll mit em Auti aane.

Buscheli mit und ooni Hoor,
sin im grosse Root e grossi Gfoor.
Au wenn dye Glaine gar nit gryyne,
deerfe au die Härzige nit in Rootssaal yyne.
Ooni Hoor, härzig und glai,
muess jetz dr’ Baschi Dürr au hai.

Ych weiss uss nit ganz sicherer Quelle,
worum mir uff d Lara Guet Berami nimm kenne zelle.
Me seit ass sy Zwilling iiberkunnt,
sy syg im 3 Monet und beidi Buebe gsund.
Dr’ Valon hätti nie draa dänggt,
ass d’ Lara im no e Dobbeladler schänggt.