D’Clochard 2018

Dr Trump dä luegt ganz fasziniert
Was an dr Liechtathletik-Olympiade passiert
D'Hochsprungdisziplin luegt är vor allem a
Drmit är waiss wie hoch e Mexikaner springe ka

E Läbensmittelinspäggter hett im Kiehlschrank unde
Inere Baiz e hampfle Schaabe gfunde
Das isch d'Byylaag maint dr Baizer und lacht
Fir's Mählwurmragout vo hit z'Nacht

Im Nationalrootsaal hänn mir vernoo
Isch dr Roger Köppel maischtens nit do
Me froggt nit, wo isch är, niemerts will's wisse
Schliesslig duet me e Fuesspilz au nit vermisse

Dr Roger Federer wird, s'isch versproche
Vom Papst das Joor no hailig gsproche
Und Wimbledon wird me denne
In "Holy Roger" umbenenne

Dr Juncker küsst jedi mit sym Rüssel
Drumm schigge mir Martullo Blocher zue ihm nach Brüssel
Lehnt dä Drache dehai, hett är gschoggt telefoniert
Eueri Forderige sind sofort akzeptiert

Im Stücki dien sie sich getraue
Achtzäh Kinos yyne z'baue
Me glaubt scho länger, me dät spinne
Und syg im falsche Film dert inne

Mir maine zum Wessels, mir hänn ihn satt
Aer isch e Schand für unseri Stadt
Drumm fordere mir ganz unverhoole
Dr Teufel soll ihn mit em Velo hoole

Dr Baschi Dürr, ha ych gheert verzelle
Will fir d'Schugger e Panzerfahrzyyg bschstelle
Fir dr Fall, dass eppis schlimm's passiert
Zem Byspiil, wenn epper falsch parkiert

Ych bi am morge am vieri aadätscht haime ko
Do stoht my Frau wüetig mit em Bäse do
Ych sag befreysch ändlig unser Huus vom Drägg
Und wenn fertig bisch denn flieg uff däm Bäse ewägg

My Frau liebt Gschwindigkeit, drumm soll ihre neie Kaare
Vo null uff hundert in knapp finf Sekunde faahre
Ych hann ere e Woog kauft, wenn sie sich dert druff duet stelle
Duet sie in zwai Sekunde vo null uff hundert uffe schnelle

30'000 Wörter am Daag soviil schwätzt my Frau
Mir Männer bruuche d' hälfti und me verstoht uns au
Das isch nur, hört me my Frau do klaage
Will me euch Männer alles zwei Mool muess saage

Mache wänn's viil, aber mit dere nit
Die ainte scho, aber jo nit zu dritt
Kain macht's mitere goppeloni
Nur sälber gmerggt hett's Merkel noni