Schuumschleeger 2018

 Fir dreifuffzig griegsch e Mählwurm-Frigadelle,
drzue kasch yygmachti Essigwürmmli bstelle.
und Betti Bossy bietet Raupe mit Spinat aa,
Jä friener hesch die Vyycher gratis im Salat kaa.
         Näbscht Vegetarier und Vegaaner
            kemme jetzt no d Insektiaaner.

In dr Firma „sicher Wohnen“, hänn mir gheert,
wird dr Viccivic als bescht Verkäufer geert.
Wägg däm Namme Viccivic, s isch nit zem saage,
kaufe Schwyzer instinktiiv Alarmalaage.
         E Pool dä reagiert do druff
         und macht e Schlüsselservice uff.

Mir zaale d Stüüre pünggtlig, doch uns blatzt dr Graage,
well s 3er-Drämmli isch dr düürschti Waggiswaage.
Me stellt bim Wessels gaischtigi Umnääblig fescht,
hett VW dä missbruucht fir e Abgaastescht?
        
Do maint dr Baudepp-Depp:“Oo,mais oui,
        
myys Kaader schlemmt in Saint Louis.“

Dr Meeresbioloog, Brofässer Doggder Glatt,
dräumt vomne Ozeanium in unsrer Stadt.
Zmits drin e Baiz, rundum Aquarie das isch schlau,
deert gääbs denn exklusiiv für d Gescht Forälle blau.
          Deert kasch als Wirt, s isch zem lache,
         e Fischzucht-Schnupperlehr go mache.

Well sich für d Poscht die düüre Pöschtler nimmi loone,
kunnt jetzt d Poscht statt mit de Pöschtler mit de Droone.
Drum het d Frau Veegeli, wo elai duet woone,
jetzt halt e Techtelmechtel mitre Pöschtler-Droone.
         Kuum duet die Frau die Droone see,
         gumpt si grad ins Neglischee.

S Rotliecht miessi an de Ample länger brenne,
damit si dr Verkehr mit Rot berueige kenne.
Mit rotem Kopf verzellt dr Baschi, hän mir gheert,
sigs in dr Wääbergass bim Rotliecht umgekeert.
         D Erfaarig zaigt mir, kuum wirds root,
         as
irgend eppis immer stoot.

E Fründ vo miir, e Waggis, dä het d Nase voll.
Är het die Falschi gstopft,  / die findets gar nit toll.
Jetzt muess är, well iiren  Aawalt isch go glopfe,
die blöödi Kue / mit Fränggli statt mit Räppli stopfe.
Doch ich bi, jo s isch wunderbaar,
en Unescowältkulturerbschnitzelbängglersuperstaar!

Ganz aggduell, e Saismograaf hets registriert,
het do in Baaasel / d Ärde stargg vibriert.
Es rüttlet, schüttlet, s gheie Bilder vo de Wänd,
jo s i sch dr Bums im Erzieigsdepartemänt.
         nit nur vom Liege
         dien sich d Bälgge mänggmool biege.

S Dornröösli wird sexuell belästigt in däm Määrli.
Dr Prinz dä küsst si zmits uff s Muul, das fräche Käärli.
In d Prinzerolle kenntsch dr JeanClaude Juncker  stegge,
denn könnt dä mitme Kuss d Ackermaa go wegge.
         Und s Schneeflittli, so stoots gschriibe,
         haigs mit siibe Zwärgli driibe. 

Als Frauefuessballschyyri stoot mir s Häärz fascht still,
well soon e Feminischtin mii verzaige will.
Ich haig am letschte Matsch mii schwäär im Doon vergriffe,
und däänen arme Frauen ständig noochepfiffe.

Die neui I-Phone- Gsichtserkennigskamera
schyynt in dr Praxis doch no glaini Mängel z haa.
Denn s I-Phone foot aa rauche, stellt dr Dienscht grad yy,
kuum luegt d Martullo-Blocher Magdalena dryy.
         Luegt dr Trump dryy heissts ganz barsch:
        
"please your face, not your Arsch!

Vo New York bis Hongkong, Kapstadt, Malibu
Egal wo d Fraue froggsch, e jeedi schreit Metoo.
Vo Schönebuech bis Ammel, Bölche bis zum Rhyy,
au deert sinn d Frauen inre Metoo-Hyysteryy.
Epp blondi, schwarzi, bruuni do gits kai tabu
sogar dr Minu, huucht Metoo das isch dr Clou.
Uff dr ganze Wält wänn alli Fraue s glyyche,
im Roger Federer mool über d Bruschthoor stryyche.
         Sogar im Tipi vom Winnetou
         schreit d Frau vom Manitou metoo.