Fazenettli Fasnacht 2017
He Baschi Dürr mach doch ändligg --- Oornig in dim Laade.
Glopf de Schugger emool uff d Finger, statt im Rhy go baade.
D Schugger Offizier könne no lang uff e Dienschtwaage waarte.
Für die Deppe längt doch e Cargovelo für privati Faarte.
Dr Morin könnt mee Orgele spiile und fuul im Gaarte hogge.
Doch ufaimool phaggt iin d Aarbedswuet, e Praxis duet iin logge.
Drzue wird äär no VR – mir finde daas famoos:
2 Teilzytjöb – wenn ain verreggt - isch dr Schaade numme halb so grooss.
40 Joor ganz unfallfrei isch dr Heiri Auto gfaare.
Aber geschtert saust em e Velo ooni z brämse in si Kaare.
Dr Velofaarer kunnt vo linggs und no usere Aibaanstrooss.
D Polizei schnappt nit dä Rowdy, nai dr Heiri isch si Billet loos.
Dr Berlusconi isch e Maitlischänder gsii, die alti Sau.
Dr Putin isch e Gängschter, het kai Reschpäggt vor Maa und Frau.
Dr Hollande macht nüt, kaa nüt, dää isch halt aifach e Gloon.
Und dr neu im Wiisse Huus, dä Trumpel, isch alles in ainre Person.
Am halber nüüni sinn si döört, föön mit Zytiglääse aa.
Am zääni gääne die erschte scho, si mien e Pause haa.
Zem Zmidaag griegt jede e Fläsche Wyy und zwai Stange Bier.
So sträng hänn si s im Spiegelhof - unsri Schugger Offizier.
Dr Johann Schneider Ammann schwätzt im Fäärnsee zue de Grangge
mit suurer Miine sait är, diend jetz Muet mit Lache tangge.
Die halbi Wält lacht iin uss, s isch si bittere Loon.
Dää basst doch aifach besser uff e Gaischterbaan ass Horrorgloon.
„Hopp Schwyz“ riefsch wenn unsri Nati dr Geegner aabeloot.
Uff Island schreie si „hoo, hoo, hoo“ ass de andre d Luscht vergoot.
Bi de Fischer do haissts „Petri heil“ sit ee und jee.
Draaisch daas umm, bisch bi de Schwoobe rächts usse bi dr AfD.
Bim Schutte wüsse s alli, wenn ain a Foul begoot,
kunnt dr Schiri z seggle und schreit „Du griegsch jetz root.“
E wysse Strich sait allne wo si stoo bliibe mien,
fascht glyych wie in dr Wäbergass - numme döört isch dr Strich halt grien.
Zeerscht zupft äär an dr Naase, no mues äär ans Fudi gryffe,
und derno verschiebt äär d Schälle und checkt au no d Pfyffe.
Mit de glyyche Finger wüscht äär sich dr Schweiss vo dr Schnuure.
Bis dr Nadal alles grichtet het, isch bim Roger s Game scho duure.
Jaaa, ych dänke, eeeh, mir mached gueti Büez, gänd alls, wänn miir uff e Platz, und – und chönnd.
Jaaa, ych dänke, vo deet häär, de Druck isch, eeeh, grooss, au wämmer uff Italie noch Sevilla gönnd.
Jaaa, ych, ych, ych dänke, mir stüürmed u-u-u-nd kämpfet. - Uns wärde d Oore bim loose wund.
Jä, hesch scho Mool ebbis Gscheits ghöört vo aim wenn dää uss Züüri kunnt.
Dr Russi maint, d Östriicher sinn vyyl z lang uff em Inneski gstande.
Jo, s isch schaad dr Bäärnhard isch im Fäärnsee laider nümm vorhande.
Wenn de bim Hüppi dr Doon abstellsch – daas goot jo no zer Not -
Wenn aaber d Steffi Buuchli schwätzt, gseen miir numme no root.
D FIFA haissts, syyg suuber, dr Schaich al-Assar vo el-Hama
isch wägg und bschisst jetz nümm mit versteggte Nöötli im Pijama.
Gmaint hämmer s Liege und s Schmiire löön ändligg noo.
Nai herrje, das System het grad --- dr Wessels üübernoo.
D Rambasse wänn an dr Uni und au bim Theater spaare.
Dr Seggelmaischter Lauber sait, mir mien e Spaarkurs faare.
Mir zwai spaare s näggscht Joor au wenn mir unsre Parcours laufe:
d Baasler griege d Zeedel ummesunscht, d Rammel mien se kaufe.
Dr Chef vom Baudep het gmaint äär syygi bsunders grisse.
Doch het äär mit Millione gschmiirt und uns gruusig bschisse.
Doo letschti isch dr Wessels uff e Notfall koo:
wyl s het iim d Pinocchio-Naase in d Speiche yyne gnoo.