Clochard Fasnacht 2016
Due finf Zitrone aabeschlugge
Friss suuri Guurge, suff Essig uss dr Gugge
Schlugg Läbertraan, gmischt mit Banane
Eso griegsch s'Lächle vom Wessels aane
Wo ych dr Blatter Sepp mit däm Pflaschter gseh
Dängg ych mir nur - oh je mi ne
Das Pflaschter uff synere Bagge steert
Das hätt by ihm doch uff d'Schnuure gheert
Me strittet sich by dere Sujetgschicht
Macht Basel zue oder macht sy dicht
Wo dr Wessels d'Innerstadt sperre lo hett
Isch dä doch zue gsy, ych mach jedi wett
Und gesesch ihn denn mit dem Lächle im Gsicht
Isch's allne klar, dä isch nimm ganz dicht
Do sait im Zug d'Frau Hägeli
S'git sy denn nimm, die Minibar-Wäägeli
Was e Kaffi mit Weggli koschtet, find ych vermässe
Fir das Gäld gang ych in's drey Keenig go ässe
Dr Morin hett gmerggt - jä mir finde das guet
Ass es ihn z'Basel gar nimm bruuche duet
Das duet unseri Hoffnig fescht bestergge
Ass dr Baschi Dürr das au duet mergge
Zum dr Verkehr besser kenne z'längge
Git's am Spalebärg Pfeschte zum versängge
Als erschte Pfoschte das wär gäh
Kennt me doch dr Wessels näh
S'tolli do dra wär, me muess bedängge
De könnsch dä ändlig im Boode versängge
Dä Rochedurm z Basel isch am greeschte
Mit em glainere mien sich d Zircher dreeschte
Nur mien sy d'Fruscht nit iiberdryybe
Die greeschti Schnuure wird ene blyybe
Lut WHO isch Wurscht und Spägg
Ungsund wie dr letschti Drägg
Do maint dr Sepp mir macht das nyt, isch mir einerlai
Sone giftige Schingge hann ych scho lang dehai
My Maa staigeret amme im Internet
Sache wo är nit kennt oder nit het
Aer bikunnt dr Zueschlag, das isch's veruggte
In zäh Joor isch d'Fuessball-WM in Buckte
Do sait mir d'Frau z'Nacht im Bett
Dass ych sy mit Wörter aamache sett
Due eppis dräggig's zue mir saage
Do flischtere ych VW-Dieselwaage
My Maa isch amme e bitz e kalte
Drumm due ych d'Belychtig uff schrummrig schalte
Drmit ych d'Luscht by ihm ka wegge
Due ych sy Brille guet verstegge
Ych ha zwai Viagrapille miesse näh
Und d'Frau hett wirklig alles gäh
Fascht hätt ych e bitzeli Luscht empfunde
Nur hann ych denn leider my Brille gfunde
Ych schigg dr Frau Clooney e SMS
Hesch mit em Georg dehai z'viil stress
Denn dät ych dä mit Handkuss näh
Und Ihre drfir my Alte gäh