|
|
Fasnacht
2015
|
Das isch nit d’Idee, vo unserem Schepfer
Ich schwätz vo deere, Conchita Gleepfer
Wenn de Baart ab nimmsch, no mergsch es glyy
Das isch de Mike Shiva, uff Extesyy
So e Jod-Dablette, ha ich gschluggt
Ha aafoo schuume, den ha ich zuggt
Uff ai moll schreit, my liebschdi „NAIII
Schatz das isch, de WC-Stai!“
Myyni baide Seen, sind wiirgglig kalt
Die saage nit aifach „Bappe du bisch Alt“
Die grinse nur „Bappe waisch,
langsam wirsch zem Bintnerflaisch“
Im Putin ha ich, e Barbie gschänggt
As dää hässig wird, hät ich nit dänggt
No ha ich gsait, „was isch den los?
De IQ basst, und sind baidi glyych grooss“
Ich ha vo miir, e Sexy Selfie gmacht
Fuudiblutt, ha frintlig glacht
s’isch hoch erotisch, sexy, toll
Doch jetz waiss ich nit, wäm ich’s schigge soll
De Bashi Dürr, isch au zem Dalai-Lama grennt
Und het Ihn gfrogt, eb Är e leesig kennt
Är isch vor Ihm gstande, und het a gaggse
„Hänt Sy e Idee, wie ich no wurd waggse?“
Im SF1 bringt d`Frau Boesch, Nochrichte schogger
Und gheit den aifach, so logger vom Hogger
Sy isch den au, grad ligge blybe
Worum basiert das nie, im 7vor 7
Basierti das, im Vo Wattewyl
Isch’s nit schlimm, dä schnurrt e scho z’vyyl
Drifft`s Tamara Wernli, b’halt ich d’rueh
Und ligg den unschiniert, derzue
Atemlos, an Moorgestraich
s’het z’vyyl Schwoobe, so e saich
Atemlos, am Cortege stoo
d’schwoobe kennte, heime go
Atemlos, im Käller sitze
Au deert het’s Schwoobe „die findens Spitze“
Atemlos, wurd ich’s begriesse
Mir dien nägscht Joor, Gränze schliesse
Sy my Frau, die het my schuurig g‘schoggt
Die isch hyylend, in der Stuube g‘hoggt
Ich ha sy gfroggt „was isch basiert?“
Scho ha ich, e gläpper kassiert
Kuum, isch my Bagge rot agloffe
Het my scho, e Vase droffe
Ha nit gwisst worum, das isch nit glooge
Den kunnt d’Fäärnbedienig vom TV gflooge
No ha ich gmerggt, wie staargg sy isch
Den uff aimool fliegt, de Stuubedisch
No ginggt Sy mir no, ins rächte Bai
Und brielt derbyy, luthals „Naii
D’Wält goot unter, s’het kai Sinn und kai Zwägg
Ich ha d’Hoffnig verloore, de George Clooney isch wägg“
Ich wott Sy den dreeschte, ich ha jo geduld
No sait Sy hässig „ und DU bisch schuld!“ |
|
