Fasnacht 2012

Bunga Bunga Berluscooni hett gärn Fraue obenooni
Mamma mia wenn me dää nuur aaneloot
numme d Merggel sait äär schoon i denn bis hütte waiss die nooni
wie das bi däm Bunga Bunga wirgglig goot
Finito Andschi sait dr Silvio ii ha Naase striche voll
froog mi glaine Fründ dr Sarkozy dä will doch au emol

Wotsch in Zuekunft Drämli faare denn nimm joo e alte Kaare
mit däm neue Drämli macht Dir dass kai Spass
Kaine traut sich aane z sitze stoot im Gang und duet no schwitze
und dr Noochber gläbbt an Dir und isch pflotschnass
jää hesch dr Muet und bisch Aine vo dääne wo s denn woggt
und uff däm neue Holzstuel sicher in e Sprysse iinehoggt

Jetzt kömme d Schwiizer zrugg an d Gränze mit de kuugelrunde Ränze
will menääne draa ganz billig frässe kaa
lägg wie die dr Kaare stopfe gseesch es hindenuuse dropfe
und dr Zöllner haltet sii scho gar nümm aa
nur Aine wäffelet so schadet iir unsrem Land
mir hänn doch numme Frangge gwächslet so wie Sie Herr Hildebrand

Hesch Du bim Aifoon s neueschte Äpp mit em Baschi singsch e Räpp
und wirsch im Schwoobeland dr näggschti Suuperstar
faarsch in d Wieschti wiiter hinde duet e Äpp no Wasser finde
und sait Dir ob s au no längt für s Dromedaar
und s beschte Äpp dass hett e ganz e explosive Zwägg
do druggsch nuur aimool uff e Taschde und dr Blocher isch ewägg

Dr Dooni Brunner suecht e Frau als Buur luegt äär die Sändig au
und mäldet sich zum Kaasting mit de Fraue aa
äär wott e schööni tolli Flotti wie das Muschter uff dr Foti
wo no kocht und butzt und au määlche kaa
stuundelang vergliicht dr Dooni welli ass iim stoot
und zaigt denn stolz uff ai so Gritte jetzt han ich mi Bundesroot

Losch bim Gwafföör d Hoor lo schniide sottisch Sproochbrobleem vermiide
suscht bruuchsch hindedraa für d Näärve noone Kuur
Saisch s uff däänisch oder fläämisch oder allefalls ruumäänisch
längt für d Hoorpflääg nochhäär Mööbelbolituur
und zmitts im Schniide kunnt dr Hakan Yakin böös in Stress
derbi hett äär doch numme gsait jää ich kenn dr Gilbert Gress

Dr Blocher wott si Bsitz kaschiere aber d BAZ manipuliere
und dää Depp Damanti unterstützt iin doo
dr Sutter als Marionette sott den BAZ für die go rette
und schyynhailig als Chef no füürestoo
dää rächti Flüügel kunnt jetzt wiider uff d Kommandobrugg
es isch als hättiis geschtert glääse d Affe siige wiider zrugg

Goosch ins Konsi füür e Flaisch nimm jo s Abphaggte das waisch
bis zum Verfuuldatum dien si s iiphaggt loo
isch s denn üüber s Datuum uuse duet s bim Konsi Kaine gruuse
und das Flaisch isch ussphaggt uffsmool wiider doo
und kaufsch denn an dr Thegge Flaisch muesch s nümm iipagge loo
das will scho sälber laufe und kaa gmietlig mit Dir haimekoo

De Iire duet dr Sprung scho glinge mit em Fallschiirm dien si springe
und au d Grieche nämme was si griege dien
jää die Schwoobe zaale zaale halb Europa hörsch scho phraale
wie si dr Merggel s Gäld us dr Däsche zien
und hänn denn die kai Gäld me reede mir nit umme Brei
lägg denn isch jo waisch wie geil unsri Schwiiz bald schwoobefrei

Uff em Schraage do im Spittel um mi umme wissi Kittel
und mi Blinddaarm luegt mi jetzte sproochloos aa
Aine ziet mi an de Oore ah das isch gar nit für d Stoore
do froogi mii was so Ain denn wirgglig kaa
worum dä Blinddaarm nooni duss isch froog ich iin frustriert
mit dääre Fallphauschaale wird dängg nur no gfliggt statt operiert

Wenn e Fingg duet d Fingge glopfe suecht me Ain zum d Löcher stopfe
um das Näschtli z fligge muesch e Voogel haa
ass dä Voogel au ka risse und uff Fingge denn kasch schisse
jää in Hamburg hänn die glatt dr falschi Maa
und loogisch isch mit soomne Voogel das muesch aifach gsee
haisst dr neui Schwiizer Maischter aimool mee FCB