Fasnacht 2012

D‘Rahel Blocher kauft d’Basler Zyttig, D’Miriam s’Läggerli Huus,
Die Maitli kaufe z‘Basel yy, jä die kömme druus
Nur dr Babbe schnuurt blöd in Bärn, fir d‘Dechter isch‘s e Stroof
Jä nu in jeedere Familie git’s e schwarzes Schoof

Dr Boris Becker und dr Pfarrer groote sich in d‘Hoor
Uff dr Hochzytsrächnig isch schyyns d‘Helfti gar nid woor
Bim Rächnigsboschte siibe het dr Boris Becker gschtutzt
D‘Byychtkabine haig är nach Gebruuch doch sälber butzt

E Sex Box fir dr Kindergarte, nai das will me nid
D‘Beate Uhse fänd das Kischtli ganz beschtimmt dr Hit
Jetzt wärde si verstaigeret, dr Bryys dä kennt me nooni
Am maischte botte het bis jetzt ............ dr Hirschmaa

Dr Karli Schwizer het ganz fescht in Nationalroot welle
Drum isch är syni Wahlblakaat an d‘Stroos go aaneschtelle
Waisch Karli d‘Schlabbe an dr Wahl, die muesch jetzt aabeschlugge
Als Striggede do hesch „s‘Zewei“ halt immer uff em Rugge

De arme Asylante fählt‘s bi uns an Wohnkomfort
Z‘wenig Gäld, kai DreiDeeFärnsee, fascht kai Blatz fir Sport
Jetzt wänn si au no s‘Hotelschiff, jo sölle si‘s doch griege
Denn ka me si grad heimefaahre und muess nid extra fliege

D‘NASA het fir Millione e Sonde zämmegschtigglet
Um d‘Hintersytte vom Mond z‘erforsche hän si die entwigglet
Uusegfunde het me, d‘Faggde liige uff em Disch
Dass es vorne hell, und hinde e bitzeli dunggler isch

Dr Staini, dä vom FCB, muess ich Eych verzelle
Het geege ManU ums Verregge gar nid gwinne welle
Bim Latteschuss an s‘aige Gool isch‘s ihm ganz blöd gloffe
Hailandsagg dä hätt sogar dr Ceccaroni droffe

Dr Minu isch zem Shiva Mike go sich lo beroote
Dä luegt em fescht und konzentriert uff sini schöne Pfoote
In dyyne Händ do seh ich zwüsche Linie 9 und 10
Laider, laider bisch du Syydebolle scho vergää

Em Gottschalk sy Ruggdritt duurt und duurt, es isch scho bald nimm woohr
Sy Ruggdritt duurt und duurt und duurt, duurt e ganzes Joor
Wenn jeede Ruggdritt so lang duurt, miecht mi das scho ranzig
Denn schnurrt dr Turnheer no im Joor 2029

Ghöört jetzt die BaZ em Oschbel, em Blocher, oder doch em Gysi
Dr Oeri, em Suter, em Tetamanti, jeede könnt drbyysyy
Ich verstand das Ganze nid, die Uffruehr isch doch gschtöört
Wenn öbbis niemert liist isch‘s doch nid wichtig wäm das ghöört