|
Die Wahlblakaat mit dääne Köpf, es isch dr Wahn,
fahrsch dra verbyy, denn mainsch sigsch inre Gaischterbahn.
D Buure setze, kuum sinn d Wahle denn verbyy,
all die Blakaat dehaim als Vogelschyychi yy.
Stoot d Pegoraro zmitts im Raps
griegt jeede Vogel e Kollaps.
Im Hakan gfallts in Bellinzona, s haig sich gloont,
as är d Sprooch nit kaa das isch är sich jo gwoont.
In zwai, drei Joor, wirdsch gsee, mir mache jeedi Wett,
as im Tessin uff aimool ganz vyyl Buschi het.
Nit nur Buschi, wirdsches gsee,
au Analphabete gits denn mee.
Lifte, straffe, Fett absuuge geege Spägg.
Denn spritzisch Botox und au d Falte sinn ewägg.
Das isch kai Scheenhaitsoperationsblaan vonre Frau,
so rette Konsum-Metzger schnäll e Gammelsau .
Macht s Gammelflaisch
mi grangg,
denn saag i "Coop sei Dangg."
D Babysitter wo in Lybie d Kinder hiete,
mien kategorisch iine s Sandele verbiete.
Denn d Angscht isch riisegross as d Goofe wo nit loose,
bim Sandele uff d Lyyche vom Gaddhafi stoosse.
Und längsch bi uns in Sand,
hesch Schyssdrägg an dr Hand.
Anschyynend länge d Läggerli de Blochers nit,
si mischle hindeduure bi dr BAZ au mit.
Wenn s so wyter goot, ir wärdet s alli gsee,
sitzt bald e Blochere im Fasnachtscomitee.
Und die vo dr EMS dä Drache
kennt ooni Larve Fasnacht mache.
Me git sich d Ehr am Basler Neujoorsaperoo,
näbscht Brominänz und Waggis sinn au Schwoobe koo.
Nur die us Lieschtel fääle, jeede waiss wiesoo,
well s isch kai Gäld firs Taxi no firs Drämmli doo.
Guy Morin Reegle: das isch doch e Huffe, e stuure,
die solle doch laufe, die Buure.
S Schwyzer Färnsee haig schyynts an dr letschte
Sitzig,
e neui Sändig blaant fir Alti iber sibzig.
Wie si haisse soll sig iinen au scho glaar:
„ Lüttet alli aa, d Schwyz suecht dr Graui Star!“
Sponser fir dä Event
wird ganz sicher Kukident.
D Merkel sait zem Sarkozy:“„loos zue du Zwäärg,
i fier elai Europa us däm Schuldebäärg.
Lueg du as d AKWs in Franggryych funggzioniere
und nit wie d Silikonbrischt bletzlig explodiere!“
I muess dr Sarkozy do loobe,
was au basiert, es zaale d Schwoobe.
Mit dääre Sexbox in dr Schuel, he lueg doch aa,
sogar dr Hansli het uff d Froog en Antwort kaa.
Das Holzding do, Herr Lehrer, das waiss jeede Lappi,
ersetzt dehai im Mammi duur e Daag dr Bappi.
Herr Lehrer, au die Blüschschvagina kasch nutze,
zem Wanddaafele butze.
Bi Sion und bi Xamax isch dr Deifel loos,
wie lang wird YB no trainiert vom Christian Gross?
Mir Basler schwänke bald dr Schwyzermaischter Schaal
und gseen uns scho im Championsleague Final.
Und imne rot-blaue Tangalumpe
wuurd dr Minu denn in Wöörlpool gumpe.
|
