Fasnacht 2012

Fir die neie Dram will d BVB
ganz brimitiv, nur Holzbängg neh
machet daas, äs wääri geil
doch nur bim Achter, dää uff Weil
inne hool und Holz - yych find
basst s Drämli denn zum Schwoobegrind

Dää doo druff - däm goot s verschisse
het s Kiini duss und d Lippe grisse
d Naase gstuucht, e Oor verbisse
d Hoor verbrennt und d Glaider gschlisse
isch am ganze Ranze wund
als wäg däm Matsch im Letzigrund

Was d Schwoobe wieschts, im Fäärnsee bringe
alti Stars wo Wiirm verschlinge
Gammelflaisch, verfuult, und ranzig
häärgstellt Nyynzääfimfezwanzig
e kain duet doo zem Brächraiz naige
bis si denn, no d Merkel zaige

Sit neischtem isch, uns fallt das uff
dr Baudepscheff jetzt sauguet druff
är prahlt wie si im Amt, wie d Affe
alli zwaimool schnäller schaffe
drum bruuchts am Spaalebäärg, äs isch woor
statt hundert, nur no fuffzig Joor

Dr Gaddafi, und dr Bin Lade
sinn gstoorbe - nai dasch kai Schaade
dr Zinsli, d Winehouse, d Martinetti
dr Steven Jobs und no e Schwetti
nur miir hänn Bäch - mien als no waarte
uff e Abgang, vo dr Schwiegerschwaarte

Miir faare jetzt, äs isch sauglatt
nur no mit em Dram in d Stadt
au haim zue denn, daas bringt s no mee
doo git s fir uns nur no d BLT
was mainsch waas miir doo Zyt yyspaare
wenn die uns haim in d Stuube faare

In Dytschland isch e wildi Hoorde
so Döönermacher goo ermoorde
me kaa doo wiirgglig, sapperlott
dängge driiber was me wott
miir finde Dööner au kai Hit
doch ganz soo gruusig, sin si nit

D Daagesschau die bringt als Zoobe
so Skandääler vo de Schwoobe
vo drimmlige Zogger bi de Bangge
und vom beese, staargge Frangge
vo wäälem, altem, ranzigem Flaisch
Micheline - scheen ass aadie saisch