Dr Fink isch nimme Trainer do
Wie’s ussgseht isch das guet eso
Ihn hett’s halt uff Hamburg triibe
Dr besseri Vogel, dä isch bliibe

By dr Ussheebig duet s’Militär sich frooge
Wo könnt me dr Shaqiri am beschste plooge
So wie sich dä bewegt, das gseht me jo gly
Setzt me ihn am beschte als Panzer y

Bym Lädele mit mynere Frau, sie kas nit fasse
Dien ihri Fiess in kai Schüehli passe
Do schreyt sie pletzlig, juhui dä goht
Und merkt nit dass sie in de Schachtle stoht

My Maa, wie kennt’s anderscht sy
Isch by jeder Kochsändig au drby
In dr Kuchi handiert är umme, ych ha ihn loo
Jo und denn isch d’Führwehr koo

Ych filz aim s’Portemonnai hinterm Rugge
Due im näggschte d’Pfuuscht in d’Schnuure drugge
Trink Whisky Cola in leere Maage
Due vom Kolleg sym Händy e Fuudifilm laade
Denn deal ych mit Drooge – so wie immer
Und gang denn cool ussem Klassezimmer

Es findet dr Pippa ihr Hinterteil
An dr Hochzyt z’Ängland jede geil
E andere Arsch isch zem Gligg nimm do
Arrivederci Silvio

E Trottoirschwalbe uff dr Gass
Wird dank dr Oma immer nass
Das syg no praktisch duet me erfahre
Eso könnt sie sich ammigs s’dusche spaare

Fir d’Spaarmassnahme isch’s heggtschi Zyt
Au s’Baselbiet macht mit, do kenne die nyt
Setze d’Schruube by dr Bildig aa
Will mer dert wo nyt isch, nyt bilde ka

Wenn ain vom Dach oobe duet Lyt attakiere
In der Volta ganz Masse dien randaliere
Denn luegt d’Polizey nur zue, duet nicht reagiere
Kennsch maine sie syge ko zem applaudiere

Was d’Fraue Ski-Nati an de Pischte duet steere
Duesch nach verlorene Renne immer wieder gheere
D’Stimmig isch guet, s’Wätter o.k
S’ainzig wo steert isch dä bleedi Schnee

Do maint dr Dominique Strauss-Kahn
Aer findet das dr blutti Wahn
S’duet au dr Berlusconi reagiere
S’ bunga bunga wurd wieder funktioniere
S’maint dr König Gustav vo Schwede
Das Ding wurd au ihn errege
Uss Spanie maint Juan Carlos
Do goht’s denn ab vamos, vamos
Hett’s by dene in dr Schuel, das wurd my Wunder näh
Ächtsch au scho sone Sexbox gäh

Vor dr EM hört me d’Stimme
Vo de Schwiizer Spieler, mir wänn gwinne
Am Schluss denn, s’isch nit ibertriibe
Isch’s das Mool nur bmy „welle“ bliibe

Sehr geehrter Herr Blocher, nundefaahne
Wie bekemme sie das au nur eso aane
Finanziell hänn sie kaini Sorge
Kaufe s’Läggerlihuss no vorem z’Morge
Und Ihrer Tochter, egal was es koschtet
Hänn sie d’BAZ schnäll über dr Mittag poschtet
Sie wüsse by allem, wie’s goht
Wärde blitzschnäll Bundesroot
Bym Apéro mecht e jede
Gärn emool mit Ihne reede
Wenn sie schwätze denn isch Rueh
Und alli loose ihne zue
Was my am maischte duet fuschtriere
Am Schluss duet me Ihne no applaudiere
Jä so wie Sie mecht ych au gärn sy
Liebi Griess ihre Morin Guy